Автотранспорт воситалари чиқиндилари даражасини аниқлаш, уларнинг экологик таснифи ва махсус экологик стикерларни бериш тартибини белгиловчи янги регламент Вазирлар Маҳкамасининг 28.11.2025 йилдаги 750-сон қарори билан тасдиқланди.
Ҳужжатга кўра, автомобилнинг экологик тоифаси ишлаб чиқарувчи томонидан тасдиқланган экологик тоифа асосида аниқланади. Ҳар хил турдаги двигателлар учун ўз мезонлари белгиланган.
Автомобиллар қандай таснифланади
Бензинли ва газли (суюлтирилган/сиқилган газ):
- "Евро-2" ва ундан юқори – "тоза" тоифа;
- "Евро-0" ва "Евро-1" – "ўрта" тоифа.
Дизель:
- "Евро-4" ва ундан юқори – "тоза" тоифа;
- "Евро-3" – "ўрта" тоифа;
- " Евро-0", "Евро-1", "Евро-2" – "зарарли" тоифа.
"Тоза" тоифага, шунингдек, гибрид автомобиллар, муқобил ёқилғида ишлайдиган транспорт воситалари ва уч йилдан кам бўлган машиналар киради.
Стикерлар бериш
Автомобиль Давлат йўл ҳаракати хавфсизлиги хизмати (ДЙҲХХ) бўлинмаларида рўйхатдан ўтказилганда ёки қайта рўйхатдан ўтказилганда экологик операторлар томонидан уч хил рангдаги стикерлар берилади:
- яшил – "соф" тоифа;
- сариқ –"ўрта";
- қизил – "зарарли".
Стикерни ихтиёрий равишда – ИИВ Жамоат хавфсизлиги департаменти сайти ёки my.gov.uz портали орқали олиш мумкин. Стикерлар муддатсиз берилади.
Босқичма-босқич, 2030 йилга қадар Тошкент, Нукус шаҳарлари ва вилоятлар марказларида "Евро-5" ва ундан юқори стандартга жавоб бермайдиган автомобиллардан фойдаланишни босқичма-босқич чеклаш жорий этилади.
Ҳужжат Қонун ҳужжатлари маълумотлари миллий базасида эълон қилинган ва 29.11.2025 йилдан кучга кирди.
