Vazirlar Mahkamasining 23.12.2021 yildagi “Nogironligi boʻlgan shaхslar ishlari boʻyicha idoralararo kengash faoliyatini yanada takomillashtirish chora-tadbirlari toʻgʻrisida”gi 769-son qarori qabul qilindi.
Prezidentning "Nogironligi boʻlgan shaхslarni har tomonlama qoʻllab-quvvatlash, ularning bandligiga koʻmaklashish hamda ijtimoiy faolligini yanada oshirishga oid qoʻshimcha chora-tadbirlar toʻgʻrisida" 2021 yil 21 dekabrdagi PQ-57-son qaroriga muvofiq Idoralararo kengash tarkibi va uning faoliyati toʻgʻrisidagi Nizom tasdiqlandi.
Nizom quyidagilarni nazarda tutadi:
- Idoralararo kengashning maqomi, vazifalari, huquqlari va javobgarligi;
- Idoralararo kengash tarkibini shakllantirish, uning majlisini chaqirish va oʻtkazish tartibi;
- Tibbiy-ijtimoiy хizmatlarni rivojlantirish agentligini Idoralararo kengashning ishchi organi etib belgilash;
- Idoralararo kengash faoliyatining natijadorligini baholash tartibi.
Quyidagilar Idoralararo kengashning asosiy vazifalari hisoblanadi:
- nogironligi boʻlgan shaхslarning huquqlarini ta’minlash sohasidagi davlat siyosatini amalga oshiruvchi davlat organlari, mahalliy davlat hokimiyati organlari faoliyatini muvofiqlashtirish;
- nogironligi boʻlgan shaхslarni reabilitatsiya qilish va huquqlarini ta’minlashga doir davlat dasturlarini amalga oshirishda ishtirok etish;
- nogironligi boʻlgan shaхslarning ta’lim olishiga, ularni kasbga tayyorlash, qayta tayyorlashga, malakasini oshirish, mehnat qilishi va bandligiga koʻmaklashish;
- nogironligi boʻlgan shaхslarning jamiyat va davlat hayotida toʻla huquqli tarzda ishtirok etishi uchun qulay shart-sharoitlar yaratishda ishtirok etish.
Hujjat Qonun hujjatlari ma’lumotlari milliy bazasida e’lon qilingan va 23.12.2021 yildan kuchga kirdi.
Lola Abduazimova.
