Prezident tomonidan 12.07.2021 yildagi "Yangi Andijon" shahrini barpo etish ishlarini samarali tashkil etishga doir chora-tadbirlar toʻgʻrisida”gi PQ-5180-son qaror imzolandi.
Hujjatga asosan 440 ming aholi uchun "Yangi Andijon" shahrini (keyingi oʻrinlarda - shahar) bosqichma-bosqich kompleks qurish uchun Andijon tumanining adirliklari hududidagi oʻzlashtirilmagan 4 ming gektar yer maydonini ajratiladi.
Shahar barpo etilishining I bosqichida 121 ming aholi uchun koʻp qavatli turar joylar, ijtimoiy soha, savdo va хizmat koʻrsatish ob’yektlari, shuningdek, kichik sanoat zonasi quriladi.
Quyidagilar tashkil etildi:
- "Yangi Andijon" shahrini barpo etish ishlarini tashkil etish va muvofiqlashtirish boʻyicha respublika komissiyasi (keyingi oʻrinlarda - Respublika komissiyasi);
- shaharni barpo etish boʻyicha doimiy faoliyat yurituvchi shtab (keyingi oʻrinlarda - Shtab);
- Andijon viloyati hokimligi huzurida "Shaharda ob’yektlarni qurish va ulardan foydalanish direksiyasi" DUK (keyingi oʻrinlarda - Direksiya).
Quyidagilar belgilandi:
- Respublika komissiyasi, Shtab va Direksiyaning asosiy vazifalari;
- Direksiya faoliyatini va shaharni barpo etishning I bosqichini moliyalashtirish manbalari.
I bosqich doirasida:
a) ob’yektlarni barpo etish buyurtmachisi funksiyalarini quyidagilar bajaradi:
- Direksiya - ichki yoʻllarni, ijtimoiy soha va obodonlashtirish ob’yektlarini qurish qismida;
- tegishliligi boʻyicha vazirlik va idoralar hamda ularning buyurtmachi хizmatlari - tashqi muhandislik, aloqa va transport kommunikatsiya ob’yektlarini qurish qismida;
b) istisno tariqasida, toʻgʻridan-toʻgʻri shartnoma asosida:
- shaharning shaharsozlik hujjatlarini ishlab chiqish uchun - bosh loyiha tashkiloti "OʻzshaharsozlikLITI" DUK tomonidan "Keym Kentsel Yenileme Merkezi A.Ş." kompaniyasi (Turkiya);
- ichimlik suvi va kanalizatsiya tarmoqlari qurilishi boʻyicha loyiha-smeta hujjatlarini ishlab chiqish uchun - "Oʻzkommunalloyihaqurilish" MChJ hamda mustaqil injiniring va konsalting kompaniyalari;
- avtomobil yoʻllari qurilishi boʻyicha loyiha-smeta hujjatlarini ishlab chiqish uchun - "Yoʻl loyiha byurosi" MChJ, "Oʻzyoʻlloyiha" loyiha-qidiruv instituti" DUK, Avtomobil yoʻllari qoʻmitasi tizimidagi boshqa loyiha tashkilotlari hamda mustaqil injiniring va konsalting kompaniyalari;
- elektr energiyasi, tabiiy gaz va issiqlik tarmoqlari qurilishi boʻyicha loyiha-smeta hujjatlarini ishlab chiqish uchun - Energetika vazirligi tizimidagi loyiha tashkilotlari hamda mustaqil injiniring va konsalting kompaniyalari;
- ijtimoiy soha, infratuzilma ob’yektlari va umumiy foydalanish maydonlari qurilishi boʻyicha loyiha-smeta hujjatlarini ishlab chiqish uchun - buyurtmachilar tomonidan eng yaхshi takliflar tanlovi orqali aniqlangan loyiha tashkilotlari hamda mustaqil injiniring va konsalting kompaniyalari jalb qilinadi;
v) shaharda koʻp qavatli uy-joylarni qurish uchun metallprokat va sement mahsulotlarini pudratchi tashkilotlarga yetkazib berish Prezidentning 2021 yil 11 martdagi PF-6186-son Farmonida koʻzda tutilgan alohida birja savdo seksiyasi orqali sotish tartibi asosida amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 13.07.2021 yildan kuchga kirdi.
Elmira Siraziyeva.
