Президентнинг 24.03.2018 йилдаги «Ташқи савдони янада эркинлаштириш ва савдо операцияларининг самарадорлигини ошириш чора-тадбирлари тўғрисида»ги қарори ЎзАда жойлаштирилган.
Мамлакатимизга импорт қилинадиган товарларни юклашдан олдин мажбурий инспекциядан ўтказиш тартиботи бекор қилинмоқда. Энди у ихтиёрий асосда амалга оширилади.
Маълумот учун: юклашдан олдин инспекциядан ўтказиш илгари ҳам барча ҳолларда мажбурий эмас эди. У умумий қиймати 10 минг АҚШ долларидан ошмаган контрактлар бўйича товарлар етказиб берилишига, шунингдек илгари лицензиялар бўйича импорт қилинган махсус турдаги товарлар (қурол-яроғ, қимматбаҳо металлар, радиоактив моддалар ва улардан фойдаланилган приборлар, асбоб-ускуналар) етказиб берилишига нисбатан татбиқ этилмаган.
Импорт қилинадиган товарларни юклашдан олдин инспекциядан ўтказиш хизматларини аккредитация қилинган инспекция органлари кўрсатадилар. Тўлов уларнинг Ўзбекистон тижорат банкларида очилган ҳисобрақамларига келиб тушади. Бунда импорт қилувчи муайян инспекция органини эркин танлаш ҳуқуқига эга, унга кимнидир тавсия қилиш тақиқланган.
Олиб кириладиган товарлар сифати, миқдори ва нархларининг «Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Лойиҳалар ва импорт контрактларини комплекс экспертиза қилиш маркази» ДУКда (Марказ) рўйхатдан ўтган импорт контрактлари шартларига мувофиқлиги учун жавобгарлик импорт қилувчининг мансабдор шахслари зиммасига юклатилади. Божхона органлари Марказда рўйхатдан ўтган контрактлар доирасида эркин муомалага чиқарилган товарлар ҳақидаги маълумотларни ахборот тизимларидан фойдаланган ҳолда унга тақдим этади.
Марказ фаолияти соҳаси татбиқ этиладиган товарлар, ишлар ва хизматлар харидларини ўтказиш (харид тартиботларини бажариш, реклама ишларини ташкил этиш, тендер ва бошқа ҳужжатларни расмийлаштириш ва бошқалар) бўйича ихтисослашган ташкилотни танлаш танлов асосида амалга оширилади. Президент ҳузуридаги Лойиҳа бошқаруви миллий агентлиги бундай ташкилотларга қўйиладиган талабларни ва давлат харидларини ўтказиш доирасида улар томонидан кўрсатиладиган хизматлар турлари рўйхатини белгилайди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Олег Заманов.
