Вазирлар Маҳкамасининг 23.06.2017 йилдаги 415-сон “Ўзбекистон Республикаси инвестициялар бўйича давлат қўмитаси тўғрисидаги низомни
тасдиқлаш ҳақида”ги қарори қабул қилинди.
Эслатиб ўтамиз, Инвестициялар бўйича давлат қўмитаси Президентнинг 31.03.2017 йилдаги ПФ-4996-сон фармони билан ташкил этилган ва ягона давлат инвестиция сиёсатини шакллантириш ва амалга оширишни мувофиқлаштириш ҳамда хорижий инвестицияларни жалб этиш учун масъул ваколатли давлат органи ҳисобланади. Батафсил – бу ерда.
Қўмитанинг асосий вазифалари ва фаолияти йўналишлари:
- ягона давлат инвестиция сиёсатини шакллантириш ва юритиш, чет эл инвестицияларини жалб қилиш, инвестиция муҳитини такомиллаштириш, чет эл капитали иштирокини қўллаб-қувватлаш;
- чет эл инвестицияларини жалб қилиш ва инвестиция фаолиятини кенгайтириш учун шароитларни яратиш чора-тадбирларини ишлаб чиқиш ва амалга ошириш;
- Ўзбекистон Республикасининг йиллик Инвестиция дастурларини шакллантиришда қатнашиш, келишиш ва мониторингини амалга ошириш;
- чет давлатлар, хорижий банклар ва халқаро ҳуқуқнинг бошқа субъектлари билан ўзаро манфаатли асосда инвестициявий ҳамкорликни ривожлантириш бўйича таклифлар ишлаб чиқиш;
- чет эл инвестицияларини жалб қилиш ва инвестициявий ҳамкорликни амалга оширишда давлат бошқаруви органлари, Ўзбекистоннинг чет элдаги дипломатик ваколатхоналарининг савдо-иқтисодий масалалар бўйича маслаҳатчилари фаолиятини мувофиқлаштириш;
- халқаро шартномаларни тайёрлашда, келишишда ва имзолашда белгиланган тартибда иштирок этиш;
- чет эл инвестицияларини жалб қилиш;
- чет эл инвестицияларидан фойдаланиш самарадорлигини ошириш;
- халқаро ва хорижий ҳукуматлар молия институтларидан жалб қилинаётган кредит ресурслари ва техник кўмаклашиш воситалари (грантлар), Ўзбекистон Республикаси Тикланиш ва тараққиёт жамғармаси, Давлат бюджети маблағларидан фойдаланиш бўйича тавсиялар ишлаб чиқиш;
- халқаро конференциялар, семинарлар, инвестиция форумлари ўтказилишини ташкил этиш;
- технологик жиҳозлар хариди бўйича тендер (танлов) савдоларида қатнашиш;
- харид қилинаётган жиҳозлар, техника ва технологиялар нарх параметрлари, борасида импорт контрактларни экспертизадан ўтказиш;
- лойиҳа институтлари фаолиятини лойиҳа ҳужжатларини ишлаб чиқиш борасида мувофиқлаштириш.
Қўмитага Бош вазир тақдимига биноан Президент томонидан лавозимга тайинланадиган ва лавозимдан озод этиладиган раис раҳбарлик қилади.
Қўмитада Қўмита раиси, унинг ўринбосарлари, шунингдек бўлинмалар раҳбарларидан иборат таркибда ҳайъат ташкил этилади. Ҳайъатнинг таркиби Вазирлар Маҳкамаси томонидан тасдиқланади.
Қўмита ҳузурида инвестиция соҳаси, илмий-техник доиралардаги, ҳуқуқ ва бошқа соҳалардаги маҳаллий ва хорижий экспертлардан иборат маслаҳат кенгаши ташкил этилади. Маслаҳат кенгашининг қарорлари тавсия тусида бўлади.
Қўмитада ишлаш учун Қўмита Вазирлар Маҳкамаси билан келишган ҳолда хорижий компаниялар ва мутахассисларни жалб этиши мумкин.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Моҳина Мирзаева.
