Вазирлар Маҳкамасининг 03.11.2023 йилдаги «Спорт соҳасида давлат хизматлари кўрсатишни янада такомиллаштириш чора-тадбирлари тўғрисида»ги 583-сон қарори қабул қилинди.
Ҳужжат билан қуйидагилар тасдиқланди:
- Давлат спорт-таълим муассасаларига ўқувчиларнинг ҳужжатларини қабул қилиш ҳамда уларнинг ўқишини кўчириш бўйича давлат хизматларини кўрсатишнинг маъмурий регламенти;
- Ўзбекистон футбол ассоциацияси футбол академияларига ўқувчиларнинг ҳужжатларини қабул қилиш ҳамда уларнинг ўқишини кўчириш бўйича давлат хизматларини кўрсатишнинг маъмурий регламенти.
Давлат хизматлари давлат хизматлари марказлари ёки ЯИДХП орқали 2023 йил 1 декабрдан бошлаб кўрсатилади.
Ёшлар сиёсати ва спорт вазирлиги томонидан ҳар йили 1 январга қадар ўқувчиларнинг спорт таълим муассасаларига ўқишга кириши учун ҳужжатларини қабул қилиш ёки уларни бир спорт таълим муассасасидан бошқасига кўчириш бўйича давлат хизмати кўрсатиладиган ҳудудлар рўйхати, қабул муддатлари тасдиқланади ва ўз расмий сайтида эълон қилинади.
Давлат хизмати кўрсатилгани учун ариза берувчидан йиғим ундирилмайди.
Ҳужжат Қонун ҳужжатлари маълумотлари миллий базасида эълон қилинган ва 06.11.2023 йилдан кучга кирди.
Лола Абдуазимова.
