Президент томонидан 20.01.2025 йилдаги “Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги ЎРҚ-1020-сон Қонун имзоланди.
Юридик шахслар Ўзбекистондан олиб чиқилаётган карантин остидаги маҳсулотнинг фумигациясини амалга оширишлари мумкин. Бунинг учун улар тегишли лицензия олишлари керак.
Маълумот учун: фумигация — ўсимликлар карантини объектларини ва бошқа зарарли организмларни йўқ қилиш мақсадида уларни кимёвий воситаларнинг газлари билан зарарсизлантириш.
Лицензия Ўсимлик карантини ва ҳимояси агентлиги томонидан берилади. Лицензия учун давлат божи миқдори – БҲМнинг 3 бараварини ташкил этади.
Мазкур фаолият билан лицензиясиз шуғулланиш БҲМнинг 250 баравари миқдорида жаримага тортиш билан жазоланади.
Шунга кўра:
- «Ўсимликлар карантини тўғрисида»;
- «Давлат божи тўғрисида»;
- «Лицензиялаш, рухсат бериш ва хабардор қилиш тартиб-таомиллари тўғрисида»ги қонунларга ўзгартириш ва қўшимчалар киритилмоқда.
Мазкур фаолиятни лицензиялаш тартиби ҳамда олиб чиқилаётган карантин остидаги маҳсулотни фумигациялаш тартиби 6 ой ичида ишлаб чиқилади.
Ҳужжат Қонун ҳужжатлари маълумотлари миллий базасида эълон қилинган ва 22.07.2025 йилдан кучга киради.
Собир Нурбердиев
