Вазирлар Маҳкамасининг 18.01.2021 йилдаги «Ўзбекистон Республикаси вакилларининг ўқишини ташкил этиш учун Япония Ҳукумати грантидан самарали фойдаланиш чора-тадбирлари тўғрисида»ги 26-сон қарори қабул қилинди.
Кадрлар тайёрлаш учун стипендиялар ажратиш лойиҳасини амалга ошириш мақсадида Япония ҳукуматининг таклифи бўйича Япониянинг етакчи университетлари магистратураси ва докторантурасида Ўзбекистон вакилларининг ўқиши ташкил этилади. Ўзбекистон ва Япония ҳукуматлари ўртасида ҳар йили имзоланадиган алмашинув ноталари ва грант битимларига асосан ўқиш учун стипендиялар берилади.
2021-2022 йилларда фойдаланиш учун 291 млн Япония иенаси миқдорида грант ажратилади.
Лойиҳани амалга оширишни мувофиқлаштириш ва ўқиш учун номзодларни танлаб олиш қуйидагилар томонидан амалга оширилади:
Ўзбекистон томонидан – Вазирлар Маҳкамасининг Таълим, соғлиқни сақлаш, маданият, ёшлар, маънавият ва жамоат ташкилотлари, маҳалла ва оилани қўллаб-қувватлаш масалалари котибияти, Олий ва ўрта махсус таълим вазирлиги ҳамда Инвестициялар ва ташқи савдо вазирлиги;
Япония томонидан – Япониянинг Ўзбекистондаги Элчихонаси, Япония халқаро ҳамкорлик агентлиги, Ўзбекистон-Япония Инсон ресурсларини ривожлантириш маркази.
Олий ва ўрта махсус таълим вазирлигига бошқа вазифалари қаторида манфаатдор вазирликлар ва идоралар билан биргаликда таҳсил олаётган стипендиатларнинг ўқиши ва ўқишни тамомлаган стипендиатларнинг меҳнат фаолияти юзасидан доимий мониторинг олиб бориш ҳам топширилди.
Ҳужжат Қонун ҳужжатлари маълумотлари миллий базасида эълон қилинган ва 19.01.2021 йилдан кучга кирди.
Наргиза Воҳидова.
