Президент томонидан 25.08.2021 йилдаги “Инвестиция лойиҳаларини ташқи инфратузилма билан таъминлаш чора-тадбирлари тўғрисида”ги ПҚ-5233-сон қарор имзоланди.
Ҳужжат 2021 йил 20 август куни ўтказилган Президентнинг тадбиркорлар билан очиқ мулоқоти доирасида белгиланган масалалар ижроси юзасидан қабул қилинган.
2021 йил 1 октябрдан бошлаб инвесторнинг қиймати 200 млрд сўмдан ошадиган, унинг ўз маблағлари улуши 25%дан кам бўлмаган лойиҳаларини зарур ташқи муҳандислик-коммуникация тармоқлари билан таъминлаш Давлат бюджети маблағлари ҳисобидан амалга оширилиши назарда тутилмоқда.
Ташқи муҳандислик-коммуникация тармоқлари билан таъминлаш ишлари бўйича молиялаштириш манбалари этиб қуйидагилар белгиланди:
- кириш автомобиль йўллари, ичимлик суви ва оқова сув тармоқларини қуриш, реконструкция қилиш ва таъмирлаш ишларининг 90%и бўйича - Ўзбекистон Республикаси ижтимоий ва ишлаб чиқариш инфратузимасини ривожлантириш дастури маблағлари, 10%и бўйича- Қорақалпоғистон Республикаси бюджети, вилоятлар ва Тошкент шаҳар маҳаллий бюджетининг қўшимча манбалари;
- электр энергияси ва газ тармоғини қуриш, реконструкция қилиш ва таъмирлаш ишлари бўйича - республика бюджети маблағлари ҳисобидан таъминотчи корхоналарга 5% ставкада уч йил муддатда қайтариш шарти билан ажратиладиган бюджет ссудаси маблағлари;
- алоқа тармоқларини қуриш, реконструкция қилиш ва таъмирлаш ишлари бўйича - таъминотчи корхоналар ва тадбиркорларнинг ўз маблағлари.
Қуйидагилар:
- ичимлик суви ва оқова сув тармоқларини қуриш, реконструкция қилиш ва таъмирлаш ишлари бўйича - "Сув таъминоти ва канализация объектларини қуриш бўйича инжиниринг компанияси" унитар корхонаси;
- кириш автомобиль йўлларини қуриш, реконструкция қилиш ва таъмирлаш ишлари бўйича - Автомобиль йўллари қўмитаси ҳузуридаги "Минтақавий йўлларга буюртмачи хизмати" ДУК, Тошкент шаҳрида Тошкент шаҳар ҳокимлигининг "Ягона буюртмачи хизмати" инжиниринг компанияси;
- электр энергияси билан таъминлаш ишлари бўйича - "Ҳудудий электр тармоқлари" АЖ ва "Ўзбекистон миллий электр тармоқлари" АЖнинг ҳудудий филиаллари;
- табиий газ етказиб бериш ишлари бўйича - "Ўзтрансгаз" АЖ ва "Ҳудудгазтаъминот" АЖнинг ҳудудий филиаллари;
- алоқа тармоқларини етказиб бериш ишлари бўйича - "Ўзбектелеком" АК ва унинг ҳудудий ташкилотлари буюртмачи этиб белгиланди.
Белгиланишича, мазкур қарор ТИАга кўра инвесторларнинг ўз маблағлари ҳисобидан муҳандислик-коммуникация тармоқларини қуриш ўзини оқламайдиган инвестиция лойиҳаларига татбиқ этилади.
Ҳужжат Қонун ҳужжатлари маълумотлари миллий базасида эълон қилинган ва 25.08.2021 йилдан кучга кирди.
Лола Абдуазимова.
